Digital signature election returns gitun-an sa mga magtutudlo

CEBU, Philippines — Nagsugod na ang Commission on Election Cebu City South District sa pagbansay sa mga magtutudlo nga moserbisyo karong umaabot nga piniliay sa Mayo 9,  partikular ang pagamit sa digital signature sa vote counting machine (VCM).

Si Election Officer Mariloy Paredes miingon nga gisugdan kini niadtong Lunes, Abril 18 ug kini matapos hantod sa petsa 30 ning bulana.

Ang mga magtutudlo kinsa magsilbing miyembro sa electoral boards kinahanglang mo-digitally sign sa mga election returns gikan sa mga VCMs. Mao kini ang unang higayon nga mogamit sa maong teknolohiya.

Ang maong kausaban kabahin matod pa sa tinguha sa COMELEC nga mas mahimong transparent ang eleksiyon karong tuiga.

Apil ang Cebu City sa mga pilot areas alang sa digital signature, ang uban niini didto gihimo sa Davao City ug National Capital Region.

“Usa man na ka feature sa atong Vote Counting Machine ang digital signature, so ang kanang atong resulta during the transmission i-transmit man gyud na, naa  siya’y digital signature from the electoral board,” matud ni Paredes.

Samtang kagahapong adlawa sab nag Oplan Baklas ang COMELEC Cebu City sa north ug south district kauban ang nagkalain-laing ahensiya sa gobyerno sama sa Department of Environment and Natural Resources(DENR), ug Department of Public Works and Highways(DPWH).

Niadtong Abril 12 unta sila maghimo og Oplan Baklas apan wala madayon tungod sa Bagyong Agaton.

Sa pikas bahin, gisugdan na sa paghatud sa Comelec ang mga election paraphernalia ngadto sa kalungsuran sumala pa ni Police Colonel Engelbert Soriano, ang provincial director sa Cebu Provincial Police Office nga gikahinabi sa mga tigbalita.

Sumala pa ni Soriano, nahatod na nila ang uban nga kagamitan sama sa battery packs, ballot boxes ngadto sa mga treasures office sa local government unit, ug gipahimutang kini ngadto sa safe nga lugar ug adunay mga nagbantay.

Giklaro hinuon niya nga wala sila kahikap sa mga election paraphernalia kay kutob ra sila sa paghatag og seguridad gikan sa bodega sa Comelec ngadto sa kalungsoran.

Si April Mae Gamboa, assistant election officer sa Comelec sa Dakbayan sa Talisay nagkanayon nga nangabot na kanila ang unang hugna sa mga ballot boxes, batteries ug plastic cover ug kini gibutang karon sa Peoples Hall sa Talisay City Hall. —/IBM (BANAT NEWS)