Rama motabang sa ubang lugar nga naigo sa bagyong Agaton

CEBU, Philippines — Gipahibalo ni Mayor Michael Rama nga gipatun-an niya karon ang posibilidad nga makahatag og pinansyal nga ayuda alang sa mga lugar nga naapektohan sa bagyong Agaton nga sama sa Leyte.

Hinoun giklaro sa mayor nga unahon sa pag-atiman sa kagamhanan sa Siyudad sa Sugbo ang nabilin pa nga hugna sa distribusyon sa P5,000 nga ayuda alang sa structure owners  nga naapektohan sa bagyong Odette.

Nasayran nga temporaryo nga nahunong ang pag-apod apod niini gumikan kay naabtan sa election ban sa Commission on Elections apan niapelar ang kagamhanan sa siyudad ug nagpaabot nalang sa skedyul sa hearing.

Kun mahuman na gani ang distribusyon sa maong ayuda , isunod dayon ni Rama ang pagpangita og P5 million nga  pundo alang sa pagtabang sa ubang lugar nga naapektohan sa labing uwahi nga bagyo nga nisulod sa nasud.

Kun dako gani ang danyos niini ug duna pa'y igong pundo, posible nga mosaka pa ang target nga P5 milyones nga hinabang alang sa laing lugar.

Suma pa ni Rama nga dili na bag-o sa Siyudad ang pagtabang sa ubang mga lugar nga naapektohan sa kalamidad.

Pabutangan usab ni Rama og stall ang usa ka bahin sa gawas sa city hall alang sa pagahimoon nga donation drive ug dinhi ibilin ang mga donasyon nga ipanghatag sa katawhan.

Kahinumdoman nga usa pud ang Leyte sa mga nagpadala og hinabang sa Siyudad sa Sugbo sa dihang giigo kini sa bagyong Odette sa miaging tuig. —MEL (BANATNEWS)