Ang krus nga gipas-an sa mga biktima sa bagyo

Dili matukib ang naagian nga kalbaryo sa mga tawong nakasinati sa kabangis sa katalagman karon sa pag igo sa bagyong Agaton ilabi na sa mga dapit didto sa Baybay City Leyte.

Ubay-ubay nga kinabuhi ang nakalas ug adunay missing tungod sa pagdahili sa yuta nga gidunganan og baha gumikan sa walay puas nga kusog nga ulan.

Nagpadayon ang rescue operation sa mga posibleng nangalubong sa pagdahili sa yuta sa mga baranggay sa syudad sa Baybay.

Hilapon ang atong kasingkasing nga magsud-ong sa mga balita sa makaluluoy nga kahimtang sa mga tawo nga anaa sa mga tambalanan.

Nanginahanglan sila og tabang karong panahona, mga doktor nga moatiman sa mga nangaangol nga anaa sa mga hospital sa Leyte ug nagkinahanglan usab sila og pagkaon ug tubig, mga senina ug ubang basic needs.

Ang Leyte ug Samar ang nagrabehan sa bagyong Odette ug gisegundahan dayon sa Agaton nga miungot pa gyud kay dugay kaayo nibiya sa Leyte ug Samar.

Dili lang diay nasegundahan kining mga lugar kay mao man sad ni ang gikulata pag ayo sa bagyong Yolanda niadtong tuig 2013.

Wala pa hingpit nakabangon sa mga katalagman giusban na sad. Dili ko ka-imagine sa kasakit ug pag antos nga ilang gibati nga mapanag-ing nato sa nahitabo ni Hesus dihang gisakit Siya sa krus.

Naatol usab karon nga gitimaan nato ang panahon diin gisubay ni Hesus ang kalbaryo pas-an ang krus nga maoy gilansagan kaniya ug namatay aron kita maluwas.

Dili man lalim ang pagsulay nga nahiaguman sa mga nabiktima sa bagyo apan pinaagi sa hugot nga pagtoo sa atong Manunubos makalagpas ra gihapon sa kalbaryo nga gisubay nila karon.

Unta niining panahon sa pagdangoyngoy sa kasakit makabati ang ubang mga tawo ilabi na ang anaa sa gahum karon aron sila matabangan nga makabarug ug makasugakod sa pagpadayon sa kinabuhi.

Karon kay tingpangulitawo man sa mga kandidato maayo unta didto sila magserbisyo sa mga dapit diin nagsinggit ang mga tawo sa ilang tabang.