26 ka pamilya nga nasunogan nipasilong sa gym sa Tipolo

CEBU, Philippines — Niabot ngadto sa 26 ka pamilya kinsa biktima sa sunog diha sa Pacienca Compound sa Barangay Tipolo, Dakbayan sa Mandaue niadtong Domingo sa hapon ang temporaryong gipasilong diha sa gymnasium sa barangay

Base sa post ni Mayor Jonas Cortes diha sa social media nga gihatagan nila og disaster kits, habol, mga malong, toiletries, starter kits mga balde, planggana ug mga can goods ang maong mga biktima sa sunog.

Base sa taho sa Mandaue City Fire Office nga napulo ka balay ang naugdaw diin 81 ka tawo ang nagpuyo niini.

Si Senior Fire Officer 2 Noel   Codilla nagkanayon nga alas 4:23 sa hapon niadtong Domingo hingpit nilang napawong ang kayo sa sunog.

Gibutyag ni Codilla nga nakasinati sila og kalisod sa pagpawong sa kayo tungod kay kuyaw nga grounded ang mga wiring sa kuryente sa maong dapit human kini nabasa sa pagbunok sa ulan.

Base sa imbestigasyon sa kabomberohan giingong ang kayo sa sunog nagsugod sa living room sa panimalay nga gipanag-iya ni Alvin Castañeda.

Ang kabomberohan mopahigayon pa kini og dugang imbestigasyon pagsuta sa hinungdan sa sunog. Laing sunog ang niulbo kagahapon sa kadlawon diha sa Atillo Compound sa Barangay Subangdaku sa maong siyudad.

Ang sunog giingong nagsugod sa panimalay ni Al Atillo diin hingpit kini nga na fir out alas 3:31 sa kadlawon. Walay gikataho nga naangol og nakalas sa maong mga insidente. Rowena D. Capistrano/BDB (BANATNEWS)