Gipabakwit tungod sa peligro

CEBU, Philippines — Dul-an 100 ka pamilya gikan sa upat ka mga lungsod sa Probinsya sa Sugbo ang gipakwit gikan sa ilang mga panimalay kagahapon tungod sa bagyong Agaton sumala pa sa Provincial Disaster Risk Reduction and Management Office (PDRRMO).

Dunay 36 ka pamilya ang napabakwit sa lungsod sa Tuburan; 22 ka pamilya sa Barangay Kinawahan ug Busogon sa San Remigio; lima (5) ka pamilya sa Sogod ug 20 ka pamilya lungsod sa Minglanilla ug siyam (9) ka pamilya usab sa San Franciso isla sa Camotes.

Sa Balamban, adunay pagdahili sa yuta nga nahitabo sa Barangay Cansomoroy tungod sa kusog nga pag-ulan samtang gibahaan usab ang barangay lunas sa lungsod sa Asturias. Didto sa Bogo, adunay mga gagmay nga mga kahoy ang nangatumba.  Didto sa Naga, adunay dalan sa Purok Argonex, Barangay Tagjaguimit nga nihulpa tungod sa sunod sunod nga pag ulan

Sa Talisay City, gipahibalo sa CDRRMO niini nga dako pa gihapong problema sa siyudad ang pagbaha.

Si Alvin Santillana nagkanayon nga ang lupa nga lugar sama sa mga sitio sa barangay Pooc, Sugarland sa barangay San Roque ug sa mga sitio sa barangay Cansojong maoy gipangbahaan.

Asoy pa niya nga pipila ka lugar sa Talisay ang agricultural land hinungdan nga makasinati sa pagbaha kung walay hunong ang pag uwan. Wala pa sab gihapon paagii ang Manipis tungod sa pagsige og dahili sa mga yuta ug bato.

Samtang dul-an sa 400 ka mga pasahero ang wala makalarga ug 99 rolling cargos sab ang nadelatar tungod sa bagyo sumala pa sa Cebu Coast Guard Station Central Visayas. –Romeo Limpangog, Gabriel Bonjoc, Rowena D. Capistrano/IBM (BANATNEWS)