Bendita sa lukay gipahigayon sa simbahang katoliko

CEBU, Philippines — Gipahigayon kagahapon adlaw nga Domingo sa tibuok simbahan sa Archdiocese of Cebu ang bendita sa lukay o Palm Sunday pagtimaan sa pasyon ni Kristo.

Sa mga dapit nga duol sa simbahan naglaray ang mga manindahay ug lukay nga giporma og krus nga gidayan-dayanan sa mga dahon sa palmera.

Kini ang gipamalit sa mga tawo nga nanimba sa St. Therese of the Child Jesus aron mabenditahan.

Sumala pa ni Fr. Japhet Geonzon, usa sa kura sa St. Therese of the Child Jesus ug Vice-Chair sa Commission on Worship sa Archdiocese of Cebu nga ang Palm Sunday maoy paghandum sa kadaugan ni Hesus sa pagsulod sa Jerusalem.

Mao usab kini ang paghandum sa sakripisyo ni Hesus aron matubos ang atong mga sala.

Nagkanayon si Fr. Geonzon, bisan sa mga nasinati nato nga trahedya ug katalagman apan wala gibiyaan ni Kristo ang katawhan ug anaa kini kanunay sa mga nasinating pagsulay.

Samtang ang kabugnaw sa panahon wa makapugong sa magtiayon nga Ferlito ug Monaliza Arnibal nga molopyo sa Tugbongan Consolacion sa pagsimba ug sa pagpamaligya sa mga lukay aron pabenditahan.

Matud pa sa magtiayong Arnibal naandan na nila ang pagdala og pongpong sa mga lukay sa ilang pagsimba sa matag tuig sa bendita sa lukay.

Ang magtiayon mga deboto sa Birhen sa Fatima og maoy hinungdan nga sa simbahan sa Our Lady of Fatima sa Basak sa Siyudad sa Mandaue usab sila mosimba.

Gitataw sa magtiayon nga mga senior citizen nga bisan kusog ang pagbunok sa ulan ilang namatikdan nga kusog gihapon ang halin sa.mga gibaligya nilang lukay gumikan kay daghan man usab ang nanimba. Romeo T. Limpangog/MEL (BANATNEWS)