Walo ka drayber, konduktor positibo sa drug test
CEBU, Philippines — Walo ka mga drayber ug konduktor ang nagpositibo sa random drug test subay sa Oplan Harabas nga gipahigayon sa mga sakop sa Philippine Drug Enforcement Agency Central Visayas diha sa North Bus ug South Bus Terminal, adlaw nga Biyernes.
Ang operasyon gipangulohan ni PDEA-7 Regional Director Levi Ortiz inabagan sa kadagkoan sa maong mga terminal.
Ang gipaubos sa drug test naglangkob sa 149 ka mga bus driver; 115 ka mga conductor; taxi driver-65 ug unom ka UV drivers.
Apan nigawas sa drug test nga tulo ka bus drivers; usa ka bus conductors; ug upat ka taxi drivers ang napositibo sa drugas. Ang tanan specimen sa mga nagpositibo ipaubos kini ngadto sa confirmatory test.
Matud pa ni Ortiz, ang mga magpositibo mopaubos ug counseling uban ang COSAP, samtang ang mga driver’s license sa mga napositibo gihuptan karon sa Land Transportation Office-7.
Gitug-an ni Ortiz ang pagpahigayon sa random drug test kabahin kini sa preparasyon sa bakasyon alang sa luwas nga biyahe sa mga sumasakay.
Mapasalamaton si Ortiz sa suporta nga gipakita sa mga nagdumala sa terminals sa pagpahigayon sa maong random drug test.— IBM (BANATNEWS)
- Latest
