Dugang brgy sa Mandaue gideklarar nga drug-cleared

CEBU, Philippines — Gideklarar na nga drug cleared barangay ang barangay Tingub sa siyudad sa Mandaue ug laing duha pa ka barangay ang magsunod niini.

Si Konsehal Nerissa Soon-Ruiz sa City Anti-Drug Abuse Council (CADAC) miingon nga ang pagdeklarar natigayon human sa gihimong deliberasyon sa mga sakop sa Regional Oversight Committee on Barangay Drug Clearing sa Philippine Drug Enforcement Agency (PDEA) 7.

Suma pa ni Ruiz nga laing duha pa ka barangay sa siyudad ang madeklarar nga drug cleared barangay human sa himoong deliberation nga gikatakda karong buwan sa Abril 2022.

Unang nadeklarar nga drug cleared barangay naglakip sa Bakilid, Tawason ug Subangdaku.

Sa laing bahin usa ka habal-habal drayber ug ang iyang kauban nga babaye ang nadakpan human namaligya og ginadiling drugas didto sa Isla Verde, barangay San Isidro, Dakbayan sa Talisay, Biyernes sa gabii.

Ang mga dinakpan nailhan nga sila si Rhayan Intano Roma alyas Kabang, 36 anyos ug iyang kauban nga si Marissa Largo Paraiso, 49 anyos nga pulos taga barangay Cantabaco, siyudad sa Toledo nga kasamtangan nga nagpuyo sa nahisgutang lugar.

Matud pa ni Police Lt. Elwood Ebona sa Drug Enforcement Unit (DEU) sa syudad nga duha ka buwan nila nga gihimo ang surveillance batok ni Roma una pa gihimo ang ilang operasyon.

Nakuha gikan sa mga dinakpan ang shabu nga nitimbang og 10 ka gramos nga gibana-bana nga balor og P68 mil ka pesos.

Ang drugas nga gipamaligya ni Roma gikan sa usa ka ginganlan og Arnel diin siya makabaligya og drugas nga moabot sa 25 ka gramos matag semana.

Gitanggong sa bilangguan ang mga dinakpan samtang nagpaabot nga pasakaan og kaso. Romeo T. Limpangog/MEL (BANATNEWS)