Dizon nagpositibo sa COVID-19

CEBU, Philippines — Gipahibalo ni 6th District Representative Emmarie “Lollypop" Ouano-Dizon nga nagpositibo siya sa COVID-19.

Hinuon sa iyang post diha sa social media iyang gipadayag nga maayo ra ang iyang panglawas tungod kay walan siya’y gipamati apan ang iyang bana nga si Jojo negatibo kini sa COVID-19.

Mapasalamaton kaayo sila tungod kay pareho sila nga mga bakunado kontra COVID-19 ug gani nakapa-booster na sila.

Sa iyang post sa niaging gabii, si Dizon nagkanayon nga bisan nga ubos pa karon siya sa home isolation apan iyang gipaniguro nga magpadayon sa pagserbisyo sa katawhan sa iyang distrito.

Nasayran nga si Dizon ang nagserbisyo isip kongresista sa ika-unom nga distrito nga gilangkuban sa Cordova, Consolacion ug Dakbayan sa Mandaue.

Wala na siya makapasubli sa katungdanan sa May 9, 2022 tungod kay nasentro na ang iyang pagtagad isip nagpapili nga kongresista sa Lone Congressional District   sa Dakbayan sa Mandaue. —BDB (BANATNEWS)