PUV Modernization

CEBU, Philippines — Mga traditional public utility jeepneys (TPUJs) nga dili kagang-kagang mao nalang ang tugotang makapamasahero apan sila makapamasahero lang ubos sa provisional authority ug dili na tungod sa prangkisa sugod Abril 1, 2022. Mao kini ang gibutyag ni Land Transportation Franchising and Regulatory Board chairman Martin Delgra kagahapong adlawa. Si LTFRB-7 regional director Eduardo Montealto, Jr. miklaro hinuon nga kaning mga modernized PUJs kasagaran ang mga operators mao ra gihapon ang nanagiya ug nagpadagan anang mga TPUJs nga di na tugotang makapamasahero.

 “So, I would like to clarify nga naa ra gihapon mga jeepneys pero bag-o na lang ilang mga units. The PUJ operators are not displaced kay nag consolidate ra man ni sila. Those jeepney drivers who wants to drive, they can still drive while those who opted to have another livelihood, the government provided them with skills trainings,” matud ni Delgra.

Kutob nalang ugmang adlawa, Marso 31,2022 ang kataposang pagpamasahero sa mga TPUJs March 31, 2022 human sobra 80 porsiyento na sa mga pasaheroang nagdagan karon sa Sugbu naghiusa na aron pagsuporta sa Public Utility Vehicle Modernization Program sa gobiyerno pinaagi sa Department of Transportation.

Kagahapong adlawa pormal nga gilusad ang 117 ka MPUJs ug 14 modernized premium taxi units diha sa Reclamation Area sa Dakbayan sa Mandaue nga gitambongan sa transportation officials ug transport operators.

Si Delgra miingon nga mao kini ang kinadaghanan og units sa usa ka PUVMP launching sukad nagsugod ang programa tulo ka tuig na ang nilabay.

Si Montealto miingon nga kining mga bag-ong modern jeepneys mobiyahe sa Metro Cebu apan kadaghanan sa Mandaue City. Gipanagiya kini sa nagkalain-laing mga transport cooperatives.

Sumala pa sa LTFRB-7 sobra  4,000 units sa modernized jeepneys ang gipaabot nga modagan dinhi sa tibuok Sugbu karong tuiga.

Samtang gipahibalo sab ni Delgra nga magsugod na sunod buwan ang Libreng Sakay program sa DOTr ug LTFRB. “Ang budget for the Libreng Sakay program is a line budget pasabot ana nga naa na gyud ni budget nga gitagana. Kanang mga istorya-istorya nga dili madayon, dili kana tinuod. Madayon gyud lage ni dili ko sigurado sa petsa basta kay sa Abril,” dugang pa ni Delgra.— The Freeman/IBM