Pildero sa tigbakay gibugalbugalan namusil

CEBU, Philippines — Patay diha-diha ang usa ka lalaki human siya gipusil sa kontra nga napildi sa tigbakay diha sa Sitio Lawis, Barangay Candulawan, Dakbayan sa Talisay niadtong Domingo sa buntag.

Ang biktima mao si Raul Pacaña Ebrado, 46 anyos nga nagpuyo sa maong dapit. Samtang ang ang suspek mao si Rogie Fuentes.

Si Police Lt. Col. Randy Caballes, hepe sa kapulisan mibutyag nga dunay tigbakay sa lugar ug nagkontra ang mga manok sa duha kun diin nabihag ang manok sa suspek.

Apan matud pa, gibugalbugalan sa biktima nga mga pildero ilabi na ang suspek hinungdan nga mipauli ang naulahi.

Apan nibalik kini nga nagbitbit na og armas ug diretsong giduol  ang biktima ug walay daghang estorya gipusil kini sa ulo hinungdan sa hinanali niining kamatayon.

Nagkanayon si Caballes nga sa ilang pakisusi gikan sa mga tawo sa lugar ang gireklamo na sab kaniadto tungod sa matud pa pagpusil niini sa usa ka ginganlan og Ben Padigos Fuentes. Si Fuentes ang paryente sa asawa sa suspetsado.

Dugang pa ni Caballes nga naila sab ang biktima nga hasol sa ilang lugar ilabi na kun mahubog.

Ang pamilya sa suspek misaad nga mokooperar sa kapolisan ug nipasalig nga ila kining awhagon aron pagtahan.— IBM (BANATNEWS)