Insekto nga bokbok midagsa sa Consolacion
CEBU, Philippines — Gikabalak-an karon sa mga molopyo sa Sitio Tawagan sa Barangay Tayud sa Lungsod sa Consolacion ang gagmay nga mga insekto nga gituohang Malaysian bug o bokbok nga manglupad panahon sa kagabhion.
Ang maong mga insekto mosulod na sa kabalayan og magtapok sa pagtugpa sa talad kan-anan panahon sa panihapon.
Nabalaka ang mga molopyo nga makahatag kini og sakit ingon man delikado usab nga mosud sa baba ug ilong sa kabataan.
Usa ka ginang sa panimalay nga nagpuyo sa maong lugar miingon nga ang gagmay nga mga insekto kon dili nila mabantayan adto na mosagol sa lung-agon nilang bugas ug usahay magtapok sa mga puti nilang linabhan.
Si Carlito Judaya, 34 anyos nga usa ka habal-habal driver miingon nga usa kagabii nga nahiagi siya sa maong dapit iyang namatikdan ang maong mga insekto nga nanglupad gikan sa usa ka establisamento nga nahimutang sa maong dapit.
Gumikan niini si Tayud Barangay Kapitan Blessilda Villo nagpadala na og sulat ngadto kang Dr. Eleonor Pardillo, municipal health officer sa lungsod sa Consolacion pinaagi usab kang Estrella Reuyan Ramelon nga maoy municipal sanitary inspector sa lungsod aron paghimo og pakisusi.
Naglakip sa mga establisamento nga gitinguha ni kapitan Villo nga masusi mao ang Pilmico Feeds, Marvick Milling Corporation ug Cargill Philippines Inc. MEL (BANATNEWS)
- Latest