CPPO nagpasiugda og peace covenant sa mga kandidato

CEBU, Philippines — Gipaabot karong adlawa ang panagtagbo sa mga magpapili pagka-gobernador sa Probinsiya sa Sugbo ug sa mga magpiling board member human ang Cebu Provincial Police Office nipasiugda sa Provincial Peace Covenant Signing diha sulod sa CPPO compound nga nahimutang sa Sitio Sudlon, Barangay Lahug, Dakbayan sa Sugbo.

Kini ang gibutyag ni Police Colonel Engelbert Soriano, direktor sa CPPO. Matud ni Soriano nga nikonpirma sila si incumbent Governor Gwendolyn Garcia ug kaatbang niini nga si kanhi tourism secretary Ace Durano nga motambong sa maong kalihokan.

Si Soriano nagkanayon nga ang ilang giimbitar sa maong kalihokan mao ang magpapili pagka-gobernador, bise gobernador, kongresista ug lakip ang mga board member.

Dugang ni Soriano nga sila sa DILG, Comelec, kapolisan ug Armed Forces magsilbing saksi sa ipahigayon nga peace covenant diin tumong niini nga ang mga politiko mosunod sila nahisulat sa balaod. (Rowena D. Capistrano/BDB)

Hulga sa bise mayor sa San Fernando susihon sa CPPO

Giklaro ni Police Colonel Engelbert Soriano, direktor sa Cebu Provincial Police Office nga wala pa sila nakadawat og report sa giingong adunay nagsunod-sunod kang Vice Mayor Ricci Reluya sa Lungsod sa San Fernando base sa post niini diha sa iyang social media page.

Matud ni Soriano nga negatibo pa sila sa giingong reklamo ni Reluya ug gani aduna sila’y gihatag nga detailed police sa mga opisyal nga Reluya.

Si Soriano nagkanayon nga ilang susihon ang post sa bise mayor tungod kay gikonsiderar nila tanan mga information mga vital ilabi na nga nagsingabot na usab ang eleksiyon.

Niining ulahi lang, si Reluya ni-post diha sa iyang social media account nga adunay nagsunod-sunod kaniyang mga armado nga tawo nga giingong nagsakay og Isuzu DMax nga sakyanan diin nabantayan niya kini diha sa karsada sa Barangay Panadtaran sa ilang lungsod niadtong Sabado sa gabii.

Ang pag-post ni Reluya adunay kalabotan sa iyang mga hulga sa kinabuhi human sa kamatayon sa magtiayong Peter ug Louella Baringuian. BDB (BANATNEWS)