P5 mil nga fuel subsidy sa Mandaue gihangop
CEBU, Philippines — Gihangop sa mga tricycle driver sa Dakbayan sa Manddue ang tinguha karon sa kagamhanan nga paghatag ngadto kanila og P5,000 nga fuel subsidy tungatunga aning padayong pagsaka sa presyo sa produktong petrolyo.
Si Rolando Aresgado, driver sa tricycle sulod na 20 ka tuig nga taga Dunggan, Barangay Basak sa maong dakbayan miingon nga gibati gyod nila ang kahinangop sa maong tinguha sa lokal nga kagamhanan. Matud pa niya nga sa 25 na niya ka tuig nga pagpamasahero karong tuiga 2022 maoy labing lisod tungod kay hilabihan ang pag- usbaw sa matag litro sa gasolina
Dugang pa niya iyang kaugalingong tricycle ang iyang gipamasaheroan ug sa pagdagan sa mga adlaw dili na paigo ang ilang kita gikan niini tungod sa kamahal sa gasolina karon. Si Mayor Jonad Cortes sa iyang bahin miingon nga gibati gayod niya karong panahona ang kalisod aa panginabuhi sa mga tricycle driver.
Matud ni Cortes sa daan na nga naapektohan ang panginabuhi sa mga tricycle driver sa pag-igo sa pandemya ug giusban pa gyud sa pag-igo sa bagyong Odette ug karon ang grabeng pagsulbong sa presyo sa matag litro sa produktong petrolyo.
Si Cortes miingon nga nagkasabot sila ni Bise Mayor Glenn Bercede ug mga sakop sa konseho nga mohatag ang lokal nga kagamhanan og P5,000 fuel subsidy
Si Konsehal Jimmy Lumapas nga maoy chairman sa committee on transportation miingon nga ang resolusyon natuki na nila sa unang pagbasa sa regular session ug masaligon siyang mapasar kini sa sunod semana.— IBM (BANATNEWS)
- Latest