Personnel sa CT-TODA daghang natabangan

CEBU, Philippines — Di lang mga tinugyanan sa balaod sa kadalanan ang papel sa City of Talisay-Traffic Operation Development Authority (CT-TODA) kundi motabang sab sila sa mga tawo nga nagkinahanglan.

Ang CT-TODA pinaagi sa ilang Facebook Page nipakita sa ilang pinalahi nga binuhatan.  Nagsunod-sunod ang ilang pagkakita og mga pitaka sa nagkadaiyang mga tawo ug ila sab kini nga gipang uli nga kompleto sa mga tag-iya.

Pinakauwahing panghitabo mao ang pagkakita ni Rosalito Nuñez og pitaka diha sa barangay Tabunok.  Usa sab ka cellphone ang gi turn-over sa enforcer nga si Larrydic Gubat sa barangay Dumlog.

Matud pa ki Jonathan Tumulak, pangu sa CT-TODA nga naa na sa 50 kapin ug kulang nga panghitabo nga nauli sa mga tag-iya ang nawagtang nila nga kabtangan.

Asoy pa niya ang mga tawo nisalig sa taga CT-TODA gumikan sa gipakita sa mga enforcer sa mga maayong buhat.

Samtang daghan nasab ang nagub-an og mga sakyanan ang gitabangan sa CT-TODA nga mapaandar og balik.

Si Eduardo Alega nga sakop sa CT-TODA maoy responsable sa pagpaandar pagbalik sa mga sakyanan nga naaberya sa kadalanan.

Nagkanayon si Tumulak nga ilang gipaningkamotan nga makahatag og serbisyo sa motorista.

Di lang pag asistar sa trapiko kundi mao ang pagtabang sa mga nagkinahanglan diha sa kadalanan.

Iyang gidayeg ang iyang mga sakop sa paghatag og saktong serbisyo ngadto sa katawhan.— IBM (BANATNEWS)