Mga kawani sa City Hall palimpyohon human sa ilang trabaho

CEBU, Philippines — Gitahasan ang pipila ka mga kawani sa Cebu City Hall nga mogahin og usa ka oras sa pagpanglimpyo inig kahuman nila og trabaho karong semanaha.

Alang kini sa mga trabahante nga dili na kinahanglan nga mouban sa ipahigayon nga Clean Up karong Sabado, Marso 19.

Ang maong sugyot giumol ni Bise Mayor Donaldo Hontiveros ug iyaha kini nga gianunsyo atol sa flag raising ceremony sa City Hall.     

“But I’ll be selecting the different departments kay nag-meet na man mi and nag-assign na mi,” nagkanayon si Hontiveros.

Matud pa ni Hontiveros nga tumong niini nga mabahin ug dili maghuot ang mga empleyado atol sa Clean-Up drive unya sa Sabado.

Dinhi usab makita nga nilihok gyud sila ug nitabang sa paglimpyo.

Gilikayan usab niya ang posibleng istorya gikan sa pipila ka mga tawo nga matud pa dunay government employees nga kutob ra gyud sa pagpahulagway ug mosibat dayon atol sa clean-up.

Suma pa ni Hontiveros nga kaabag sa gobyerno ang pribadong sektor

Ang mga empleyado nga manglimpyo human sa ilang oras sa trabaho kinahanglan nga mo-report ngadto sa ilang tagsa-tagsa ka barangay nga sila nakalimpyo anang adlawa.

Nagkanayon si Hontiveros nga mohimo siya og koordinasyon sa mga barangay alang sa maong tingoha.

Hangtud sa Biyernes ang pag-panglimpyo sa mga empleyado ngadto sa nagkadaiyang barangay.

Nanawagan ang kagamhanan ngadto sa publiko nga mohatag og dakong kooperasyon pinaagi sa pagtarong og labay sa ilang mga basura.     

Kahinumdoman niadtong miaging buwan mokabat sa 16 ka tonelada ang basura nga nahipos atol sa pagpanglimpyo sa mga kawani sa City Hall diha sa daplin sa kadagatan. MEL (BANATNEWS)