Komunikasyon sa drug personalities sa gawas, tanghaga pa sa kapolisan
CEBU, Philippines — Gibutyag sa kadagkoan Cebu City Police Office (CCPO) nga dakong hagit gihapon kanila hangtud karon ang pagtumbok kun giunsa sa mga tigpayuhot og ilegal nga drugas ang pakig-komunikasyon sa ilang mga kontak diha sa sulod sa Cebu City Jail nga padayong nagpadagan sa ilang negosyo gikan sa sulod.
Si Police Lt. Colonel Wilbert Parilla, Deputy City Director for Operations sa CCPO miingon niadtong Lunes nga kapin sa 50 porsiyento sa ilang operasyon batok sa ilegal nga drugas ang nasubay nga gikan sa usa ka piniriso sulod sa CCJ.
“That is a big challenge (communications inside) kay ang main source naa sa sulod, then ang atong mga madakpan is only ang mga sinaligan lang nila..if mabaw-an wala sad tay mahimo kay naa naman sud,ang atoa unta, ma stop ang communication gikan sa sulod,” ni Parilla pa.
Nasayod sab sila nga ang mga piniriso sa sulod naggamit og mga alyas sa matag sugo nila sa lang mga sakop diha sa gawas nga maoy aktwal nga maghatud, maghipos ug modawat sa halin sa ilegal nga drugas.
Niadto lang Domingo sa gabii, nasikop sa Pardo Police Station sa CCPO ang usa ka high value individual sa Villa Zacate, Barangay Basak Pardo nga si Randy Aranduque, 35. Siya nalakip sa database sa Regional level drug personalities.
Nasakmit gikan kaniya ang 150 gramos nga gituohang shabu nga gibana-banang mobalor og kapin sa usa ka milyon ka pesos.
“Based on our investigation, siya ni ang sinaligan, the same gihapon iyang story, ang iyang source is naa gihapon sa sulod (city jail),” matud ni Parilla.
Padayton ang pakig-alayon sa CCPO sa Bureau of Jail Management and Penology (BJMP) ug Department of Interior and Local Government (DILG) bahin aning problemaha. —Rowena Capistrano/IBM (BANATNEWS)
- Latest
