Restobars wa na motuman sa health protocols
CEBU, Philippines — Ang Cebu City Police Office (CCPO) mosugyot ngadto sa Emergency Operations Center (EOC) nga pahatagag ultimatum ang mga establisementong wala na usab motuman sa social distancing sa ilang mga customer sukad nga gilugakan na ang mga restriksyon nunot sa pagkunhod sa mga kaso sa Covid-19.
Si Police Lt. Colonel Wilbert Parilla, Deputy City Director for Operations miingon nga naobserbahan nila nga ang mga parokyano ilabi na sa mga balay kalingawan sama sa mga bars wala na magsuot bisan facemask ug nagdasok na sab.
Dihang gipaubos sa kategoryang Alert Level 2 ang siyudad gitugotan ang 100 porsiyentong kapasidad sa mga establisemento subay sab sa mga direktiba nga giluwatan ni Cebu City Mayor Michael Rama. Apan kinahanglang motuman sila sa tanang health protocols.
Si Parilla miingon nga niadtong weekend ilang naobserbahan ang mga establisamento nga wala na motuman sa mga health protocols partikular ang mga restobars.
“We will bring it up, then policy will be made, or ordinances and we will implement it. Depende sa EOC or city government kung unsa ilang ganahan mahitabo,” ni Parilla.
Bisan sa paglugak sa restriksyon, gipadayon sa kapolisan ang Oplan Bulabog nga naglakip sa pagpatrolya ug pagpatuman sa minimum health standard protocols sa publiko ingon man pag -inspeksyon sa mga establisemento.
Mahimong silotan sa Business Permit Licensing Office (BPLO) ang usa ka establisemento nga nakalapas sa mga health protocols sama pagsuspenso sa ilang mga permit ug pagpasira kun di sila motuman human gibadlong.
“Nga mura og nagtoo na sila nga nahuman na atong pandemic when in fact naa gihapon, it’s only nga niabot lang ta sa number of required nga vaccinated (individuals), but the pandemic is still here,” pagpasabot pang Parilla.— IBM (BANATNEWS)
- Latest
