Oplan Tokhang gibalik sa kapolisan

CEBU, Philippines — Gibalik sa kapolisan ang Oplan Tokhang batok sa mga tawong kaniadto notado ng nalambigit sa ilegal nga drugas nga natokhang na sab apan namalik sa mao gihapong bisyo.

Sa Dakbayan sa Talisay, 15 ka tawong giingong nalambigit sa ginadiling drugas sa Barangay Lawaan 3 ang gipangtuktok og balik sa kapulisan.

Ang Oplan Tokhang o gikan sa mga pulong nga “tuktok” ug “hangyo” usa ka kontrobersiyal nga programa sa kapulisan nga gisugdan sa paglingkod ni Pres. Duterte nga mideklarar og all-out war batok sa ilegal nga drugas niadtong tuig 2016.

Ang tumong niini mao nga tuktokon ang mga pinuy-anan sa mga notadong nalambigit sa ilegal nga drugas gikan sa listahan sa mga Barangay Anti-Drug Abuse Council (BADAC) kun diin sila magpuyo aron hangyoon nga mohunong na sa ilang bisyo ug mopaubos sa community based drug rehabilitation.

Apan nahimo kining kontrobersiyal tungod kay pipila sa mga natokhang ang nangatikangkang o nangamatay sab sa mga police anti-illegal drugs operations.

Kusganon hinuon gihimakak sa kapolisan ang maong mga alegasyon ug miinsister nga nisukol ang mga drug suspects ug gidepensahan lang sa mga polis ang ilang kaugalingon.

Ang subling pagpahigayon og Oplan Tokhang sa kapolisan sa Dakbayan sa Talisay, gikuyogan sila og mga representante gikan sa barangay nga maoy nakaila kanila.

Ang grupo ni Police Lt. Col. Randy Caballes nitagsa-tagsa sa pagbisita sa mga panimay niadtong mga notadong drug suspects nga padayung nalambigit sa ilegal nga drugas aron hatagan og tsansa nga malimpyo ang ang ilang pangalan.

Kasagaran nga gipangtuktok mga niagi na sa rehabilitasyon apan nahibaw-an nga nibalik sa ilang ilegal nga kalihukan.

Subli silang gitambagan nga mohunong na niini ug magbag-o. Wala pa hinuon mopagawas og pamahayag ang Police Regional Office-7 kun subli ba nila kining pangusgan pagbalik.