Magtutudlo sa Bakwit School napatay sa engkwentro
CEBU, Philippines — Usa sa pito ka mga magtutudlo nga gidakop ug gipasakaan og kaso tungod sa pagdagit sa mga 19 ka Lumad nga kabataan gikan sa Mindanao nga gidala dinhi sa Sugbu niadtong tuig 2021, napatay atol sa engkwentro tali sa militar ug mga rebeldeng New People’s Army didto sa Davao de Oro sumala pa sa report sa militar.
Ang maong magtutudlo mao si Chad Booc alyas Chad, kinsa usa sa mga giingong “Bakwit School” teachers nga maoy nidala sa 19 ka mga kabataang Lumad sa usa ka retreat house diha sa sud sa University of San Carlos- Talamban Campus sa Cebu City niadtong tuig 2021.
Sa report sa 10th Infantry Division, nahitabo ang engkwentro niadtong Pebrero 24,2022 sayo sa buntag diha sa Purok-8, Barangay Andap, New Bataan, Davao de Oro.
Kauban ni Chad nga nakalas mao sila si Jojarain Alce Nguho II alyas Rain, usa ka naila lang sa pangalang Daday ug duha ka wala pa mailhing mga lalaki nga pulos gituohang mga sakop sa NPA nga nag-operate sa
lugar. "In a series of armed encounters, five members of the CTG were killed in the clash, while it is believed that there are still several others wounded based on the bloodstains in the encounter site," matud pa sa report of 10th ID, Office Division Public Affairs.
Giingong duna pay mga kauban ang grupo nga nangaangol ug nakahigayon sa pagikyas base sa mga lama sa dugo sa ilang giagian sa pag-ikyas human sa 15 ka minutos nga engkwentro.
Narekober sa lugar ang usa ka M653 rifle, usa ka .45 pistol, usa ka granada, usa ka anti-personnel mine,
nagkalain-laing pagkaon ug mga personal nga gamit.
Kahinumdoman nga niadtong Pebrero 15, 2021, si Booc usa sa mga gidakop sa kapolisan diha sa USC Campus
atol sa gilusad nga rescue operation sa mga operatiba sa kapolisan ug militar diha sa sud sa USC –Talamban
tungod sa pasangil nga ilang gidala ang mga Lumad nga kabataang taga Talaingod sa Mindanao.
Gipasakaan sila og kasong Child Abuse Law, Anti-Trafficking in Persons Act, ug kidnapping and serious
illegal detention.
Kauban ni Booc nga gidakop sila si Segundo Lagatos Melong, Benito Dalim Bay-ao, Moddie Langayed
Mansimoy-at, Esmelito Paumba Oribawan ug Jomar Bena.
Ang grupo gipasanginlan sa kapolisan ug militar nga plantalya lang nga recruitment arm sa NPA pinaagi sa
ilang Bakwit School program. Ang mga ginikanan sa mga bata maoy nidangop sa kapolisan ug misumbong bahin sa
pagdala sa grupo dinhi sa Sugbu sa ilang mga anak nga wala mananghid kanila.
Apan niadtong Mayo 5,2021 ang Provincial Prosecuroty sa Davao del Norte mibasura sa ilang kaso tungod sa
kakuwang sa ebidensiya ug huyang ang pasangil batok kanila hinungdan nga sila gipabuhian.
Sumala pa sa report sa 10th Infantry Division, si Booc graduwado nga Cum Laude sa UP Diliman sa kursong
Bachelor of Computer Science.
"He was a known activist and recruiter to the CTG even in his UP days. He was also involved in
Manilakbayan, a protest march organized by the CTG involving Indigenous Peoples coming mainly from Mindanao in
2015," matud pa report sa militar.
"After his college days, he volunteered as a Mathematics teacher in the Alternative Learning Center for
Agricultural Development (ALCADEV) in Lianga, Surigao del Sur, and later on volunteered for the Bakwit School in
Cebu," dugang pa niini.
Si Brigadier General Jesu Durante III, Commander 1001st Brigade miingon nga sa pagkapatay kang Booc
kauban sa mga rebeldeng NPA, nagpakita lang nga ang 'ALCADEV, MISFI, Salugpungan, CTCSM, ug uban pan
organisasyon o programang mugna sa maong grupo mao gyuy “breeding grounds” sa mga rebeldeng NPA. “We call on to the parents whose children are still with these institutions to take action. Rescue your
children immediately before it’s too late. Seek help from the authorities so that we can eventually rescue
them,” dugang pa ni Durante.
Sa pikas bahin, ang National Union of Peoples’ Lawyers (NUPL) Cebu nga maoy nanalipod kang Booc ug mga
kaubanan niini atol sa pagsikop kanilasa Cebu miingon nga ilaha pang giberipika ang kamatuoran sa maong report. (BANAT NEWS)
- Latest