Charter Day gisaulog kagahapon

CEBU, Philippines — Bisan pa man sa mga pagsulay, ang pagpakalig-on sa mga Sugbuanon maoy nag-unang rason nga nakabarog gihapon kini. Pipila lang kini sa mga mensahe kagahapon atol sa kasaulogan sa Cebu City Charter Day.

Nangulo sa seremonya sila si Mayor Michael Rama ug Bise Mayor Donaldo Hontiveros kauban ang pipila ka mga konsehal.

Gihimug-atan usab ni Rama ang dakong kooperasyon sa katawhan aron matagamtaman ang kagawasan.

Usa sa pinasidunggang dinapit sa maong kalihokan mao si Cebu Governor Gwen Garcia kinsa nipadayag usab sa mga hiyas sa Sugbuanon sa kaisog niini sa pagsagobang sa mga pagsulay.

Matud pa niya nga bisan gisugat ang mga Sugbuanon sa pandemya ug bagyo, naningkamot gyud kini nga makabangon dayon.   Gihimo usab ang wreath laying sa monumento ni Don Vicente Rama sa Plaza Sugbo. Lakip sa kalihukan ang memorial lecture alang kang Don Vicente nga maoy amahan sa charter sa Dakbayan sa Sugbo ug gihimo usab ang feeding program sa 80 ka barangay.

Ubos sa Republic Act no. 7287, ang Pebrero 24 sa matag tuig gideklarar nga usa ka special non-working holiday sa Siyudad sa Sugbo nga giila nga Cebu City Charter Day.

Gibutyag sa mayor nga dili gyud niya malimtan ang prinsipyo sa iyang apohan nga kinahanglan nga ipatigbabaw ang panerbisyo.

Gihimo usab sa miaging gabii ang indigay sa balak ug awit ingon man ang pagpasidungog sa pipila ka empleyado sa City Hall ug sa mga personalidad ug institusyon nga giingong nakatabang sa pipila ka programa sa siyudad sa Sugbo.

Gihimo usab kagahapon ang grand draw sa Bakuna Bonanza diin pipila sa mga premyo naglangkob sa sakyanan, balay,yuta, gift certificates ug uban pa . MEL (BANATNEWS)