Curfew, restriksyon gilibkas na sa Cebu City
CEBU, Philippines — Gipirmahan na ni Cebu City Mayor Michael Rama ang Executive Order No. 163 kun Oplan Kagawasan nga epektibong naglibkas sa curfew ug pagpaluag sa mga restriksyon atol sa pagsaulog sa Cebu City Government sa ika-85th Charter Day Celebration sa Cebu City kagahapong adlawa.
Gitawag kini og ‘Gawasnon na ang tanan’ tungod kay naa sa EO ni Rama nga ang tanang establisemento ug mga kalihukan mahimo ng buhaton, makagawas na sab tanan menor de edad man o dili, bakunado man o dili.
Gilibkas na sab ni Rama ang curfew sa mga hamtong apan magpabilin ang curfew para sa mga menor de edad tungod kay naa may ordinansa niini ug kinahanglan kini ipatuman.
Subay niini, si Atty. Collin Rosell miingon nga ang EO ni Rama moepekto sugod kagahapong adlawa human niya kini gipirmahan.
Gihimug-atan ni Rosell klaro kaayo sa EO ni Rama nga kinahanglan lang gyud mag-amping dili lang sa kaugalingon apan apil na sa uban ug mga kaubanan.
Mahimo ng magpasud 100 porsiyento ang mga establisemeto apan dili gihapon nila kini mahimo tungod kay kinahanglang sundon gihapon ang basic health protocols sama sa social distancing. Subay niini, si Police Lt. Col. Maria Theresa Macatangay, information officer sa Cebu City Police Office (CCPO) nga magpabilin ang kapulisan pagsita sa mga tawong dili mosunod sa health protocols.
Si Cebu Governor Gwendolyn Garcia maoy pinasidunggang dinapit sa maong selebrasyon kinsa nanawagan sa tanang Sugboanon nga magkahiusa gyud bisan paman sa mga kalisdanan.
“On this 85th historic celebration of the Charter Anniversary of Cebu allow me to say as Governor of the Province of Cebu, the Province is one with the City of Cebu as we move on, move forward and achieve even greater heights of progress and development because kita mga Sugbuanon,” matud ni Garcia.— IBM (BANATNEWS)
- Latest
