CCLEC nanghatag og ayuda sa grupo sa mga mananagat
CEBU, Philippines — Nitunol og hinabang sa miaging adlaw ang Cebu Cordova Link Expressway Corporation (CCLEC) ngadto sa mga organisasyon sa mananagat sa Dakbayan sa Sugbo kansang panginabuhian naapektuhan sa bagyong Odette. Uban sa kadagkoan sa Cebu City Agriculture Department ang CCLEC ni-turn over sa kinahon nga canned goods ug sinakong bugas ngadto sa mga sakop sa Alliance of Cebu City Fisherfolk.
Gilangkoban kini sa 13 ka mga organisasyon sa mananagat nga dunay 546 ka mga miyembro gikan sa barangay Mambaling, Ermita, Pasil, Cogon Pardo, Basak San Nicolas, ug Inayawan.
Si Esterlito Jay Mesa, secretary sa Pardohanong Pundok Kabus Mananagat sa Cogon Pardo nagpasalamat sa CCLEC tungod kay dakung tabang ngadto kanila ang maong mga hinabang.
Kahinumdoman ang CCLEC uban sa ilang parent firm nga Metro Pacific Tollways Corporation (MPTC) aktibo sa pag-apod-apod usab og relief goods ngadto sa mga komunidad sa Cebu City ug Cordova, nga naapektuhan sa bagyo.
Sa laing bahin gipanglista sa kagamhanan sa Dakbayan sa Talisay ang mga tawo nga nangreklamo nga wala maapil sa pagpanghatag og ayuda.
Si mayor Gerald Anthony “Samsam” Gullas nihimo og grievance committee nga modawat sa mga reklamo ug gipanglista ang wa makadawat og susihon kini sa City Social Welfare Department CSWD.
Gipasabot sab ni Edgar Mabunay, City Budget officer nga naa ra’y igong pundo ang siyudad alang niadtong wala pa malakip sa paghatag sa pinansyal nga ayuda. —Gabriel C. Bonjoc/MEL (BANATNEWS)
- Latest
