Lacson maayong moatiman sa iyang mga sakop

CEBU, Philippines — Gipasigarbo ni Baguio City Mayor Benjamin Magalong si Partido Reporma presidential candidate Panfilo ‘Ping’ Lacson ilabi na sa iyang pagdumala sa iyang mga sakop.

Atubangan sa mga tigbalita gipadayag ni Magalong ang pamaagi ni Lacson sa dihang mao kini ang hepe sa Philippine National Police (PNP) samtang siya usab maoy commander sa Special Action Force (SAF).

Sumala pa sa mayor nga bisan og istrikto, ug seryoso si Lacson isip PNP Chief, maayo kining moatiman sa iyang mga sakop ilabi na paghatag og tabang sa mga nagkinahanglan.

Lakip na niini ang pagtabang sa pamilya sa mga mamatay nga polis samtang nagtuman sa ilang trabaho.

Nakahinumdom pa si Magalong dihang siya pay SAF commander dihang namatyan sila’g usa ka polis sa engkwentro ug nakadawat siya og grabeng sermon gikan kang Lacson apan nakurat siya sa gihimo niini.

“Kaya ang lungkot-lungkot ko. After siguro mga isang oras, tumawag na sa akin ‘yung PNP comptroller, si General Acop—(dating Antipolo) Congressman Romy Acop—‘Benjie, sabihin mo sa akin ilan ‘yung anak ng pamilya ‘nung namatay na pulis natin? Makakatanggap sila lahat ng scholarship hanggang mag-graduate sila sa college,’” matud ni Magalong.

“And then during the particular awarding, alam niyo ba kung anong ibinigay sa pamilya ‘nung namatay kong sundalo? Nabigyan niya ng house and lot. Ganyan po si Senator Lacson,” segun ni Magalong.

Sa usa ka misyon nga nahitabo sa Jolo, Sulu diin tulo ka SAF ang grabeng naangol ug kinahanglan nga dad-on sa Zamboanga, inay nga paabuton ang C130, mismo si Lacson ang nimando nga dad on dayon sila sa St. Luke’s Hospital sa Makati sakay sa commercial flight sa Philippine Airlines.

Sa gihimong pakigdayalogo ni Lacson ug sa iyang running mate nga si Senate President Vicente ‘Tito’ Sotto III sa mga miyembro sa Rotary Club sa Newtown Hotel sa Baguio City, gipasalamatan niya ang mayor tungod sa iyang prinsipyo ug kaisog nga pulos nila nakat-onan isip mga kadete sa Philippine Military Academy.

Suma pa sa mayor sa PMA nakuha ni Lacson ang kinaiya nga “Ang tama ipaglaban, ang mali labanan.”