Tumulak di moatras
CEBU, Philippines — Hugtanong gihimakak ni Konsehal David Tumulak III ang nikatap nga taho nga matud pa niatras na siya sa iyang pagsalmot sa bugnong lugaynon . Si Tumulak midagan pagka-mayor sa Cebu City isip independenteng kandidato.
Aminado ang beteranong mediaman nga si Tumulak nga bisan dili susama ang iyang makinarya sa ubang kandidato ,dili gyud siya moatras sa kombate sa politika.
Si Tumulak naa na karon sa katapusang termino pagka-konsehal sa siyudad. Nakaalyado niya pareho ang higpit nga managkaribal nga lokal nga partidong Partido BARUG ug Bando Osmeña Pundok Kauswagan (BOPK).
“Dunay nanggawas nga mga chismis nga ako daw kay moatras kung magkaduol na ang eleksyon. Kana kay usa ka dakong bakak. Dili intawon na tinood. Wa ko'y hagit nga akong giatrasan,”saysay pa ni Tumulak pinaagi sa Facebook Live.
Bisan pa man sa mga hagit nga iyang nasugatan, gitataw sa konsehal nga dili gyud niya atrasan ang eleksyon karong tuiga.
Gihimakak usab ni Tumulak ang laing intriga nga matud pa nga gipadagan siya sa usa ka partido aron mabahin ang botos sa katawhan.
“Dunay mga naggawas nga mga estorya nga gipadagan kuno ko sa kanhi mayor, Tommy Osmeña. Kana dili na tinood. Duna pu'y nanggawas nga mga istorya nga ako kuno kandidato sa incumbent Mayor Michael Rama. Kana usa ka dakong bakak," matud pa ni Tumulak.
Gisalig ni Tumulak ngadto sa katawhan ang kapalaran sa iyang politikanhong karera. —IBM (BANATNEWS)
- Latest