Mga naninda sa Bagsakan gireklamo kay nilapas sa orihinal nga pwesto

CEBU, Philippines — Adunay walo ka estraktura nga mga sari-sari store, painitan ug ice storage nga gitugotan sa Cebu City Hall nga makapaninda sa Bagsakan diha sa South Road Properties ang gireklamo sa management sa SRP human nga giingong nilapas ang ilahang estraktura sa orihinal nga pwesto nga gihatag sa kanila.

Nasayran nga ang management sa SRP nihatag og lugar sa Bagsakan apan kinahanglang dili sila molapas sa railings nga gibutang.

Kagahapon sa buntag gipakigtagboan ni Market Administrator Raquel Arce ang tag-iya sa maong mga estraktura ug gisabotan ang angayan nga buhaton kini aron magpabilin nga sila makapaninda diha sa dapit.

Ug gumikan kay aduna man sila’y pagtugot gikan sa Cebu City Hall si Arce nagkanayon nga pangitaan sila og lugar nga dili molapas sa railings nga gibutang.

Gibahin ang oras sa pagpaninda sa mga manindahay diin tag 12 oras sila pwedeng makatinda kini aron mahatagan og higayon nga sila mahalinan.

“Mao nang nangutana ko og unsay ilahang vitamins kay nganong 24 hours unya everyday so ato lang nga naa pa sila’y panahon makapahuway unya wala nay lugar mag- dwell sila so undang sila og tinda hiposon ilang tinda uli sila, taga Pasil man sila, ang ilaha man gud walay hiposay mao nga anha sila matulog. Nihatag lang ta nila og 12 hours sa ato kong mo-open ka diha og 12:00 midnight close ka 12:00 noon, kong mo open ka’g 2:00 am mo close kag 2:00 pm unya atong gitumong sa klase sa negosyo aron dili sila magdungan ang painitan og tinda”, pasabot ni Arce. —BDB (BANATNEWS)