33 mil pamilya sa siyudad sa Naga gihataga’g cash assistance

CEBU, Philippines — Moabot  33 mil ka pamilyang naapektahan sa bagyong Odette ang mahatagan og financial assistance gikan sa lokal nga kagamhanan sa Dakbayan sa Naga.

Sumala pa sa post sa Facebook page sa maong siyudad pito na ka barangay ang nakadawat sa maong financial assistance sugod niadtong Huwebes, Pebrero 3; kini mao ang Central Poblacion, East Poblacin, Tangke, Pangdan, Cabungahan, Lutac ug Tagjaguimit.

Ang gidak-on sa gihatag nga hinabang magdepende sa gigrabehon sa kadaut nga nahiaguman sa ilang mga panimalay. Kadtong nagusbat gyud ang balay hatagan og P5 mil samtang kadtong na-damage lang og gamay tag P2 mil.

Ang siyudad nitagana og P66 milyones gikan sa kaugalingong panudlanan niini aron tabangan ang mga naapektahan sa bagyo.

Sa pikas bahin, ang Philippine Gaming Amusement Corporation (PAGCOS) mihatag og mga relief packs sa  600 ka pamilya sa isla sa Caubian sa Dakbayan sa Lapu-Lapu nga anha gipaagi sa buhatan ni Kong. Paz Radaza.

Ang mga relief packs naglakip sa bugas, canned goods, noodles, kape ug tubig nga mainom.

Ang maong isla una nang nahatagan og mga materyales pagtukod og balay gikan sa siyudad human daghan sa mga kabalayan didto ang nawalis sa bagyong Odette.— Romeo Limpangog/IBM (BANATNEWS)