Medisina, kahimanang medikal Mao unyay tutokan ni Padilla

CEBU, Philippines — Igong pang-medikal nga kahimanan ug supply sa medisina alang sa katawhan  maoy usa sa mga hatagan og pagtagad ni Dra. Minguita Padilla kun mahatagan siya og higayon nga makalingkod sa Senado.  Si Padilla nidagan ubos sa line-up  ni Senador Panfilo ‘Ping’ Lacson. Sa press conference niini dinhi sa Sugbo kagahapon, gipalanog niya nga importante kaayo ang implimentasyon sa mga programa sa gobiyerno  alang sa panglawas .

Gihimug-atan ni Padilla nga kinahanglang duna kanunay saktong imbentaryo sa mga medisina aron masuta ang istado niini ilabi na sa labing gikinahanglanon sa publiko.

Sumala pa niya nga kun dunay saktong monitoring dili magkaproblema ang katawhan sa pagpangita og mga tambal.

Aminado siya nga dunay mga kabus nga nagkinahanglag lapad nga health program.

Usa pud pud sa iyang plano ang pag-umol og mga programa nga maghatag usab og importansya sa mga panginahanglan sa mga health workers.— IBM (BANATNEWS)