Pond A diha sa SRP ug Inayawan Landfill gikatakdang ugmaron

CEBU, Philippines — Nagpinirmahay na kagahapon sa joint venture agreement (JVA) tali sa kagamahan sa Siyudad sa Sugbu ug Expedition Construction Corporation alang sa pag-develop o pag-abuno  sa Pond A diha sa South Road Properties (SRP) ingon man usab sa pag-develop o rehabilitasyon sa Inayawan Sanitary Landfill.

Matud ni Mayor Michael Rama nga na-conceptualize ang maong ideya niadtong tuig 2015 ug mapasalamaton siya nga mahatagan na gyud kini og katumanan din motabang usab kini sa pag-usbong sa ekonomiya sa siyudad.

Taud-taod na nga gipangandoy ni Rama nga malimpiyohan ang Inayawan Landfill isip usa sa pagpakita og dakong concern sa environment.

Samtang usa sa gilaoman nga mosulbong sa maong 60 ka ektarya nga bahin sa SRP ang recreational area, mga patigayon ug uban pa.

Tumong usab nga tukoran ang maong dapit og usa ka hospital.

Gipadayag usab sa mga representante sa Expedition Construction nga ang maong proyekto makahatag og lapad nga oportunidad sa panarbaho ug pang-world class ang output niini.

Gipaniguro usab sa maong kompaniya nga dili kini makadaot sa kalikupan sa higayon nga masugdan na ang kaugmaran niini.

Dili pa matino kanos-a masugdan ang actual nga construction sanglit nagpadayon ang pag-umol sa master plan sa engineering nga aspeto.

Sa pasiuna nila nga pagtuon, moabot ngadto sa P20 bilyones ang magasto sa  pribadong kompanya alang sa nahisgotang proyekto.

Giingong magsilbi unya kini nga bag-ong atraksiyon sa siyudad.

Nasayran nga lima ka tuig ang target duration sa maong proyekto.

Nagkanayon si Konsehal Raymond Garcia nga nalakip usab sa kasabotan mao ang taytayan sa usa ka bahin sa SRP paingon sa Inayawan nga magsilbing access road. —BDB (BANATNEWS)