Tulo, apil bata gipangtigbas sa silingan

CEBU, Philippines — Tulo ang angol lakip ang usa ka minor de edad atol sa nahitabong pagpanigbas sa may Purok 7, Barangay Cogon, Bogo City, alas sais kwarentay singko sa gabie, adlaw nga Lunes.

Ang mga biktima sa pagpanigbas mao sila si Randy Gallarde, 40, minyo, anak niining babaye nga 12-anyos ug Francisco Catamco, 61, puros residente sa maong lugar.

Samtang ang suspetsado mao si Amancio Barba Jr., 56, silingan sa mga biktima. Base  sa inisyal nga imbestigasyon ni PSSgt. Leliano Pepito Jr., naginom sila si Gallarde ug Catamco sa dihang kalit nga niabot ang suspek nagdala og sundang ug walay daghang pangutana gidiretso sila og tigbas niini sa makadaghan nga higayon, giapil sab niini pagtigbas ang bata.

Ang mga biktima daling gidala sa tambalan, samtang ang suspetsado dali ra usab nakasibat human sa maong insidente.

Ang kapulisan padayon pa karon nihimo ug hot pursuit operation batuk sa suspetsado ug gani adunay mga hulagway niini nga nikatap sa social media.

Ang kapulisan, blangko pa sila sa motibo sa pagpanigbas ug padayon pa usab sila karon nihimo ug imbestigasyon.

Ang mga biktima nalandig kini karon sa tambalanan ug padayon nga giatiman sa mga doctor.— Romeo Tagli Limpangog/IBM (BANATNEWS)