Vendors sa Carbon nagprotesta
CEBU, Philippines — Mga manindahay sa Warwick Barracks ug Freedom Park sa Carbon Public Market nag noise barrage kagahapong adlawa aron pagpakita sa ilang pagsupak sa pagbalhin sa ilang pwesto.
Si Antonio Remedio, chairman sa Freedom Park Traders Association miingon nga kapin 700 ka mga vendors sa Warwick Barracks ug Freedom Park ang gipaabot nga ibalhin sa sudlunong bahin sa merkado.
Apan supak sila niini kay nabalaka silang dili na hinuon mahalinan ug mawad-an na hinuon og panginabuhian.
Ang pagpabalhin kanila may kalabotan kini sa Joint Venture Agreement (JVA) tali sa Megawide Construction Corp. ug sa Cebu City government bahin sa modernisasyon sa maong merkado.
Ang Carbon Alliance nipasaka og kaso batok sa mga opisyales sa siyudad sa Sugbo sa tinguha nga ibasura ang JVA apan gi-dismiss kini sa Regional Trial Court Branch 10 kay wala makombinsir ang korte nga maapektahan sa modernisasyon ang kita sa mga vendors.
Si Remedio miingon nga lisod, gagmay ug bati ang pwesto, dili accessible sa mga tawo ang pabalhinan kanila.
Ang mga ipangbalhin mao ang mga manindahay og buwak, furnitures, dry goods, karenderya, prutasan ug uban nga naa diha sa Warwick Barracks ug Freedom Park.
Si Market Administrator Raquel Arce miasoy nga ang mga manindahay naa ra gihapon sa market complex ug ang Unit II building nga temporaryo nilang balhinan aron mapahigayon ang development sa ilang lugar hapsay man ug wala sad sila’y kompetensiya kay silang tanan ibalbin ug wala’y ibilin. —IBM (BANATNEWS)
- Latest
