P4.1 bilyones ang danyos ni Odette sa umahan ug pangisdaan sa Sugbu
CEBU, Philippines — Mokabat P4.1 bilyones ang danyos nga gibilin sa bagyong Odette sa Agri-Fishery sector sa lalawigan sa Sugbu, apan moabot sa 31.2 milyones ang gitagana alang sa Agri-Fishery Insurance Program sa lalawigan karong tuiga.
Matud pang Roldan Saragena, ang provincial agriculturist ang kwentada gikan mismo sa tanang mga agriculturists sa kalungsoran ug component cities sa lalawigan. Dunay 36 ka LGUs kansang agri-fishery ang nangagusbat tungod sa bagyo ug nagbilin kini og P4,179,859,344.00 nga danyos.
Mismo si Gob. Gwendolyn Garcia ang niinspeksyon sa mga nangagusbat nga agri-fishery sa lalawigan. Human niini ang pagpadala dayon sa tanang hinabang nga gikinahanglan.
Apan bisan pa niini, duna gihapoy pipila ka mga hut-ong sa mga maguuma ang nireklamo nga wala sila makadawat og tabang gikan sa probinsya. Kini sama sa mga maguuma sa DAS sa Toledo City.
Apan si Saragena miingon nga niadtong Enero 5,2022 ang probinsya mihatag og 353 ka paketeng nagkalain-laing liso sa utanon, lakip niini ang mga hybrid nga lubi, nangka, yellow corns, saging, ug daghan pang uban. Gipasa nila kini ngadto sa city agriculturist aron maoy mohatag niini sa ilang mga maguuma.
“Ilaha sab untang tabangan ilang kaugalingon pinaagi sa pag-coordinate sa ilang barangay officials o moadto sa ilang agriculture office,” pasabot pang Saragena.
Matud niya, anang petsaha nakahatag sab ang lalawigan og P567,336.70 nga insurance sa 80 ka mga maguuma.
Ugmang adlawa dunay “Barangayan” sa Toledo City nga pasiugdahan sa Provincial Agriculture Office nga mobisita sa mga barangay aron maghatud og serbisyo ug programa para sa mga maguuma ug mga mananagat.
Siya nidugang nga sa miaging tuig, ang Agri-Fishery Insurance Program sa probinsiya nakahatag og insurance premium nga mokabat P29.9 milyones ug ang P3,162,605.00 niini diha gihatag sa 2, 449 ka mga maguuma ug mananagat sa Toledo City.
Giangkon hinuon ni Saragena nga dili tanang maguuma ug mananagat sa Toledo City ang insured sa Philippine Crops Insurance Corporation, mao nga giawhag sila karon sa pagpa-insure sa ilang tanaman, pangisdaan o panagatan.
Sa gitaganang P31.2 milyones nga Agri-Fishery Insurance Program budget karong tuiga, ang P19 milyones niini para sa poultry ug namuhi og hayopan, samtang P13.2 ang sa mga maguuma ug mananagat.— IBM (BANATNEWS)
- Latest