IEC gamiton og balik isip temporary treatment facility

CEBU, Philippines — Malaumon si Cebu City Mayor Michael Rama nga subling  magamit ang pavilion sa IEC Convention Center (IC3) sa may Barrio Luz ning dakbayan isip temporary treatment and monitoring facility (TTMF) ilabi na karon nga nagkasaka ang kaso sa COVID19. Suma pa ni mayor Rama nga usa sa nihimo sa maong inisyatiba mao si Office of the Presidential Assistant for the Visayas (OPAV) Secretary Michael Dino.

Ang maong sugyot gipadangat na ngadto kang Arsobispo Jose Palma. Kahinumdoman nga sa pagsugod sa pandemya niadtong 2020, gihimo na kini nga monitoring facility alang sa mga nataptan sa COVID19.

Matud sa mayor nga dili sa tanang higayon nga nahaom sa home isolation ang usa ka pasyente busa labing maayo nga iandam usab ang TTMF. Gipaandam na usab karon sa mayor ang Cebu City Quarantine Center (CCQC) nga pagadumalaon na lang sa Cebu City Health Department inubanan sa pag-abag sa Emergency Operations Center. Ang kasamtangang barangay isolation center karon mao ang City Central School.

“As we have been relentless nga maka-barug ta og balik human sa kalamidad, padayon ta sa paghulma sa mas tataw ug sinalmotan nga Road to Recovery. Apan mahinungdanon nga mangandam kita sa epekto sa nasinati karon,” suma pa ni Rama.

Sa laing bahin, upat ka vaccination sites na unya ang modawat sa mga tawo nga magpabakuna batok covid-19 Sa dakbayan sa Talisay. Si mayor Gerald Anthony “Samsam” Gullas miingon nga ilang paspasan ang paghatag og bakuna ngadto sa katawhan ilabi na karon nga nagsaka og balik ang mga kaso.  Nagkanayon si Gullas nga abli ang naandan nga vaccination site sa Lagtang gym, Gaisano SRP ug sa Starmall ug nadugang niini mao ang Talisay City College (TCC) sa barangay Poblacion. Gabriel C. Bonjoc/MEL (BANATNEWS)