Mga mild symptom sa COVID-19 mag-home isolation lang

CEBU, Philippines — Gibutyag ni Cebu City Mayor Michael Rama nga sa pakighinabi niini kang Cebu Governor Gwendolyn Garcia kagahapon sa buntag ilahang natuki ang paghatag og direktiba sa mga tambalanan nga ang mga pasyente nga madala sa emergency sa ospital ug nagpakita lang og mild symptoms sa COVID-19 ug dili critical o severe papaulion sila ug mag-home isolation lang.

Matud ni Rama nga responsibilidad usab sa Emergency Operations Center Cebu City, Cebu City Health Department ug Department of Health ang pag-monitor sa mga pasyente.

Sa laing bahin, si Rama nagkanayon nga ang pharmaceuticals nipasalig nga adunay igong supply sa mga tambal sama sa fever ug flu medicines nga “out of stock” na kadaghanan sa mga botika.

Si Rama nagpakitabang kang Senador Christopher Lawrence “Bong” Go kalabot sa mga tambal ug nimando sab siya sa pangulo sa Cebu City Health Department Dr. Jeffrey Ibones nga paspasan nga ang paghatag og tambal sa katawhan.

Gipangitaan na og mga tawo aron maoy mohatag sa mga tambal ug aron usab paspas ang pagpang-apod-apod niini.  Nasayran nga nisaka ang demand sa mga fever ug flu medicine gumikan sa hulga  sa Omicron variant.

Samtang sa Dakbayan sa Talisay, dako ang pagtuo sa pangulo sa City of Talisay-Traffic Operation Development Authority (CT-TODA) nga ang tinakdanay sa COVID-19 nahitabo sa pagsakay sa mga pasahero sa pampublikong sakyanan.

Kini human giwagtang na ang barrier o plastik nga gipangmontar sa mga traysikol ug PUJ.

Si Jonathan Tumulak, hepe sa CT-TODA nagkanayon nga ilang gipahugtan ang pag- implementar sa pagbalik sa gidaghanon sa mga pasahero.

Tulo ka tawo lang ang pwedeng makasakay sa sa traysiko sa siyudad.

Nihangyo usab si Tumulak ngadto sa EOC nga ilakip sa pagpangutana sa contact tracer ngadto sa mga tawo nga nagpositibo kong unsa ang ilang gisakyan sa nanglabay nga adlaw. —Gabriel C. Bonjoc/BDB (BANATNEWS)