P300 mil ang natigom sa Sinulog telethon para sa biktima sa bagyong Odette

CEBU, Philippines — Moabot ngadto sa kapin sa P300,000 ang natigom sa gipahigayon nga telethon niadtong Domingo atol sa virtual program alang sa Sinulog 2022.

Suma pa sa  chairperson sa  Cebu City Tourism Commission (CCTC)  nga si Atty. Jocelyn ‘Joy’ Pesquera nga mayoriya sa mga nihatag og donasyon  kay taga Cebu samtang ang uban niini kay nagikan sa pipila ka parte sa nasud.

Matud pa niya nga ang Sinulog Foundation Inc. na ang mopaigo sa nadawat nga donasyon nga adto ihapak sa relief efforts alang sa mga biktima sa Bagyong Odette. Gihulagway ni Pesquera nga malampuson ang maong telethon kay mao pa kini ang labing unang higayon nga gihimo kini nga kabahin sa selebrasyon Sinulog.

Ang maong kalihokan naghangyo sa ubang tawo nga tabangan ang mga nanginahanglan ilabi na kadtong apektado sa bagyo.

Dugang pa ni Pesquera nga bisan nahuman na ang Sinulog, andam gihapon modawat ang SFI og donasyon aron mas daghan pa ang matabangan.

Kahinumdoman nga nangulo sa simple nga  virtual Sinulog 2022  nga gipahigayon sa Fort San Pedro mao si Mayor Michael Rama ug gitambongan kini ni Governor Gwendolyn Garcia.  

Bisan pa man sa mga pagsulay  nga giatobang sa mga Sugbuanon , nahimo gihapon nga undanon ang selebrasyon sa sa Sinulog 2022.— IBM (BANATNEWS)