Free working space sa Mandaue bukas na

CEBU, Philippines — Hingpit na nga gibuksan kagahapon Enero 17, 2022 ang gitawag og Free Co-Working - Space nga gipasiugdahan sa kagamhanan sa Dakbayan sa Mandaue alang sa mga Mandauehanon.

Kini gitumong aron sa paghatag og kahigayonan alang niadtong nagtrabaho ubos sa work-from-home set up ug dunay libre nga internet ug kape alang sa mopahimulos niini.

Sa Face book post sa Public Information Office (PIO) sa kagamhanan sa maong dakbayan ilang gipahibalo ang gikinahanglang rekisitos.

Ang maong free working space bukas sa tanan nga Mandauehanon sulod sa 24 oras nga operasyon.

Lakip sa mga rekisito nga gikinahanglan nga pagadad-on mao ang proof of residency, company ID o certificate of employment, work-from-home arrangement sa buhatan nga gitrabahoan ug nanag-iya kini og laptop, charger ug uban pa nga mga gadgets.

Segun sa pahibawo sa Mandaue PIO nga gumikan kay limitado man ang ilang lugar himoon nila kini pinaagi sa first come, first serve basis.— MEL (BANATNEWS)