Chan: Mga barangay officials wala mokooperar para sa P5mil nga ayuda

CEBU, Philippines — Mga barangay officials sa Lapu-Lapu City wala mokooperar aron mahatagan og tag P5 mil ang mga indigents nga biktima sa bagyong Odette diha sa ilang mga barangay.

Si Mayor Junard “Ahong” Chan mipasangil nga dunay mga kapitan nga wala molihok pagproseso sa mga gikinahanglan aron mahatagan og ayuda ang ilang nga kabus nga konsituwente. Sagad sa wala pa mahatagi mao ang taga mainland barangays tungod kay dunay mga barangay officials nga wala molihok pagproseso sa listahan.  “Gikuha nila ang form, certificate of indigency and certificate of residency and master list( of the registered beneficiary) wa nila trabahoa, matud pang Chan sa mga tigbalita. Tungod niini, buot ni Chan nga paesplikahon kining mga barangay officials kun nganong wala nila lihoka nga para man kini sa kaayohan sa mga nabiktima sa bagyo.

Gipahibalo na ni Chan sa DILG ang wala pagkooperar sa mga barangay kapitan ug gimandoan siya padad-an sila og suwat aron paesplikahon. Sa pagkakaron, listahan palang gikan sa Olango island ang napagawas ug maoy benepisaryo sa tag P5 mil nga ayuda.

Sa post ni Chan sa social media gilista niya ang mga  pangalan sa mga tawong makadawat kini aron ang katawhan mismo maoy makabasa ug kun mahimo makareklamo o makasugyot kun kinsay dili ug kinsay angayan nga makadawat.

Giklaro ni Chan nga pinasubay niya kini sa guidelines sa DILG aron masayod daan sa katawhan ayha pa mabutang opisyal sa payroll.

Gitinguha nga sa Enero 15-16 mahatag na kining hinabang.— IBM (BANATNEWS)