Sunog sa Mandaue
CEBU, Philippines — Miulbo ang dakong sunog sa Sitio Utnai sa Barangay Tingub ug kasikbit niining Sector 6 sa Brgy. Pagsabungan sa Dakbayan sa Mandaue niadtong nakalabay nga gabii, Enero 8,2022.
Ang sunog miugdaw sa mga pinuy-anan sa 150 ka pamilya nga hangtud karon padayon pang nanikay-sikay nga makabangon gikan sa kadaut nga gibilin sa bagyong Odette.
Nadawat sa kabomberohan ang alarma alas 7:44 ug hingpit kining napawong alas 10:32 na sa gabii. Ang sunog giingong nagsugod sa panimalay ni Felix Amodia.
Gibana-bana nga moabot ngadto sa P1,050,000.00 kapin o kulang ang gibiling danyos.
Matud pa ni Fire Supt. Noel Nelson Ababon, Fire Marshal nagpahigayon pa sila og imbestigasyon sa hinungdan niini.
Ang mga biktima temporaryo karong gipahimutang sa mga lawak saringan sa elementary school sa duha ka barangay.
Nagpadayon na usab ang paghatag kanila og hinabang sa kagamhanan nga baglakip sa mga sleeping kits, portable toilets ug mga ready to eat nga pagkaon
Sa kasamtangan ang buhatan sa City be Social Welfare and Development Office (CSWDO) ang nagpadayon pa karon sa pagtala sa mga biktima alang sa paghatag kanila og dugang pang ayuda.— Rowena D. Capistrano/IBM (BANATNEWS)
- Latest
