LGU Madridejos naka-8th place nationwide sa LSR collection efficiency

CEBU, Philippines — Ang lokal nga kagamhanan sa Madridejos pormal nga gipasidunggan sa Department of Finance–Bureau of Local Government Finance (DOF-BLGF) isip usa sa mga Top Performing LGUs ubos sa Municipality Level sa Collection Efficiency alang sa Locally Sourced Revenues (LSR) sa Fiscal Year (F.Y.) 2020.

Sigun sa nalatid sa BLGF Memorandum Circular No. 031.2021, ang LGU Madridejos nalandig sa No.8 nga puwesto sa tanang mga munisipalidad sa tibuok nasud, No. 1 sa entiro Central Visayas (Region 7) ug bugtong lungsod sa 44 ka munisipalidad sa probinsiya sa Sugbu nga naapil sa maong dalaygon nga luna isip national awardee.

Gikan sa target niining P25.71 million, ang LGU Madridejos nakakolekta og P44.18 million nga buhis kon collection efficiency nga 171.8 porsiyento sa LSR niini sa miaging tuig.

Bisan og taliwala sa kalibutanhong pandemiya, ang impresibong nakab-ot sa Madridejos nahimong posible tungod sa hiniusang puwersa ug pagtambayayong sa LGU Madridejos ubos sa liderato ni Mayor Salvador “Sally” S. De la Fuente, mga miyembro sa Sangguniang Bayan (SB), mga sakop sa LGU Finance Department, ug sa tanang  mga empleyado nga nakatampo aron masakmit sa lungsod ang maong talagsaong dungog.

Si Mayor De la Fuente nagkanayon nga ang maong pasidungog usa ka testamento nga ang LGU Madridejos nagtrabaho ug naningkamot og maayo aron makahatag og tinud-anay ug paspas nga serbisyo ngadto sa katawhan. Timaan kini nga ang mga buhis nga gibayad sa mga lumulopyo adto gyud deretso sa kaban sa lungsod ug gigamit alang sa kaayuhan sa mga Lawisanon ilabi sa pagdalit kanila og nagkadaiyang mga serbiyong sosyal ug uban pa. Emmanuel Villaruel/MEL

Pag-amendar sa tax amnesty ordinance giuyonan sa konseho

Giuyonan sa konseho sa siyudad sa sugbo ang sugyot nga amendahan ang city ordinance No. 2572 nga naghatag og lugway sa pagpatuman sa tax amnesty hangtud sa September 30, 2022.

Hinuon ang maong gisugyot nga kausaban sa ordinansa kinahanglan pa nga ipaubos sa public hearing sa dili pa ang ikaduhang pagbasa.

Ang city ordinance 2572 nga gitawag og “Tax Amnesty Ordinance of 2019”, mao ang ordinansa nga naghatag og amnestiya sa mga magbubuhis nga napakyas sa pagbayad sa buluhisan sa tukmang panahon.

Pinaagi niini mamahimo na nga matangtang ang penalties ug ubang surcharges sa wa makabayad sa saktong panahon sa ilang real property taxes, business taxes, ug uban pa.

Ang maong lakang gipangamahanan ni Councilor Raymond Alvin Garcia.

Naaprobahan niadtong August 14, 2020, ang city ordinance 2572 gitumong aron pagtabang sa mga taxpayers o magbubuhis nga naglisud sa pagbayad sa ilang buluhisan nonot sa nasinate nga pandemiya.

Ubos sa section 4 sa ordinansa nalatid nga kadtong mga magbubuhis nga mahimong makapahimulos niini mao kadtong dunay wa mabayri nga buhis sa  local taxes, apil na ang  real property taxes, business taxes, community taxes, ug ubang bayronon ug kun ang propedad wa pa mapaubos sa auction. The Freeman/MEL