Storm surge sa lungsod sa Carmen, 1 ka balay naguba

CEBU, Philippines — Usa ka balay didto sa barangay Luyang sa lungsod sa Carmen, Cebu ang naguba human kini naigo sa storm surge didto sa maong dapit.

Matod ni Grace Villena ang disaster office clerk sa Carmen DRRMO, nahitabo ang paghapak sa tubig sa balay mga alas 12 sa tungang sa Disyembre 8. Hinoon, nakabakwit ra ang pamilya ni Lilia Remoto nga maoy nagpuyo sa maon balay.

Padayon ang gihimong monitoring karon sa disaster office sa Carmen lakip na sa Provincial Disaster Risk Reduction and Management Office sa mga areas, hilabina kadtong prone sa pagbaha, pag dahili sa yuta ug kadtong anaa daplin sa baybayon tungod sa nasinati nga bati nga panahon sa niaging mga adlaw.

“Tungod sa weather karon naay gitawag nato nga scattered thunderstorms nga mag-uwan didto sa south or sa north…keep monitoring lang sa mga sitwasyon unya naa sa ilang discretion ang pag tan-aw ug paghatag og information sad sa mga local chief executives alang sa mga lakang nga himuon” matod ni Wilson Ramos ang  Interim officer sa PDRRMO.

Didto sa lungsod sa Daanbantayan, gisuspenso ni Mayor Sun Shimura ang klase sa elementary ug high school sa lungsod tungod sa di maayong panahon kagahapong adlawa.

Didto sa syudad sa Bogo, ang LGU nipahimangno na usab sa ilang mga residente nga kinahanglan alerto, human nga naapil sa orange warning level category ang dakbayan kagahapong adlawa. Pasabot, nga anaa sa “75,000-150,000 ka baril sa tubig uwan ang ibundak matag usa kilometro kwadrado sa matag takna”

“Giawhag ang tanan nga magmatngon labi na gayud kadtong anaa sa mga low-lying ug flood prone areas sama sa mga mosunod nga barangays:  LPC, Bungtod, Taytayan, Gairan, Don Pedro ug Polambato. —MEL (BANATNEWS)