Kampo ni Durano moduso og motion ngadto sa Sandiganbayan

CEBU, Philippines — Gikatakdang moduso og motion for reconsideration ang kampo ni  gubernatorial aspirant Ace Durano ngadto sa Sandiganbayan human nga ang korte nidesisyon nga si Durano ug ubang staff sa Department of Tourism (DOT) guilty sa graft case kalabot sa giingong anomaloso nga wall calendar project niadtong tuig 2008 sa dihang siya pa ang kalihim sa DOT.

Adunay tulo ka kaso nga gisang-at batok kang Durano niadtong tuig 2016 kalabot sa pipila ka proyekto sa DOT ubos sa iyang termino apan duha niini ang na dismiss na.

Ang usa maoy nahabilin nga subject sa desisyon sa Sandiganbayan niadtong Nobiyembre 26, 2021. Nangankon si Durano na nasurpresa siya sa maong development ug nagduda sa timing niini.

Ang kaso naggikan sa P2.7 million contract sa DOT ngadto sa PDP Digital Inc. alang sa "conceptualization and development” wall calendar alang sa tourism promotion campaign sa ahensiya.

Ang maong kontrata giingong gi-award kini nga wala moagi sa hustong bidding ubos subay sa Akta Republika 9184 kun “the Government Procurement Reform Act”.

“Dili sad ni issue sa overpricing or ghost project. Ang issue ra gyud ang proseso gigamit sa DOT sa pagmugna sa project”, matud ni Durano.

Si Atty. Dwight Remedio, legal counsel ni Durano nagkanayon nga adunay alternatibo nga paagi sa procurement pag-abot sa transaction sa gobiyerno sama sa goods and services nga gikonsiderar nga “proprietary in nature".

Ang kampo ni Durano naghulat pa kini sa kopya sa desisyon sa Sandiganbayan.

“Kibaw naman ta unsa ni kay ako DOT secretary niadtong 2004 hangtud 2010.

Gisugdan nila'g file ning mga kaso paghuman sa 2016 nga election, unom ka tuig human ko wala na sa DOT. Sunod kaso napud gipasaka pag-2019 nga election”, matud ni Durano.

Dugang ni Durano dili kini makapahunong sa ilahang tinguha sa “a dream of a better Cebu", kon siya mapili pagka gobernador sa tuig 2022. —BDB (BANATNEWS)