NBI padayon sa imbestigasyon pagsakop sa kauban ni Bargamento
CEBU, Philippines — Si Atty. Renan Oliva, direktor sa National Bureau of Investigation-7 nibutyag nga nagpadayon sila karon sa ilang lawom nga imbestigasyon.
Kini aron masayran ang mga posibleng kauban ni Kara Marie Bargamento, ang kawani sa Cebu City Market Operations Division nga nasikop tungod sa giingong pagpangilkil sa mga manindahay sa Carbon Market.
Matud ni Oliva nga nakagawas na si Bargamento human kini nakabayad og P90 mil nga piyansa niadtong Biyernes apan magpadayon pa gihapon ang ilang imbestigasyon.
Gibutyag ni Oliva nga nakig-alayon na ang ilang buhatan ngadto kang Mayor Michael Rama kinsa nagpahigayon usab og imbestigasyon kalabotan sa maong insidente.
Matud usab ni Oliva nga ang ilang buhatan mopadala og subpoena ngadto sa giingong mga kakunsabo ug sa posibleng mga saksi sa hitabo.
Dugang ni Oliva nga padayon silang niawhag sa mga giingong nabiktima ni Bargamento nga modangop sa ilang buhatan aron mahimoan usab og imbestigasyon ang ilang reklamo. —BDB (BANATNEWS)
- Latest