Vaccination sa Cebu City nakasugat og kakulian

CEBU, Philippines — Si Dr. Jeffrey Ibones, officer-in-charge sa Cebu City Health Department nibutyag nga sa unang adlaw sa pagpahigayon sa national vaccination days niadtong Nobyembre 29, 2021 Lunes adunay mga nasinating kakulian hinuon dili kini kalikayan.

Apan niadtong Martes sa ikaduhang adlaw sa national vaccination days nilambo ang vaccination services sa siyudad ug sa kataposang adlaw sa vaccination kagahapon.

Si Ibones nagkanayon nga mohimo sila og assessment sa angayang palambuon ilabi na nga adunay taho nga sa umaabot nga adlaw subling ipahigayon ang kalihokan.

.Sa unang adlaw sa national vaccination days kapin sa 31,000 ka tawo ang nabakunahan apan giklaro ni Ibones nga partial pa kini gumikan kay nagsige pa sila og encode ug ilang giihap kon pila ka vial ang nahurot.

Sa ikaduhang adlaw sa national vaccination days kapin sa 30,000 ang nabakunaha ug klarohon pa kini ni Ibones aron mahibaw-an kon pila gyud kabuok ang nabakunahan.

Sa laing bahin, niabot ngadto sa 16,000 ka tawo sa Dakbayan sa Talisay ang nakadawat og bakuna diin lapas kini sa ilang target nga 13,000 ka tawo.

Si Dr. Lino Alanzado, pangulo sa City Health Office nagkanayon nga ang nakadaghan sa magpabakuna mao ang mga empleyado nga giingnan sa ilang mga amo nga mosunod sa kamandoan sa IATF ug sa DOLE. Gani diha sa Borromeo Brothers Elementary School sa Barangay Cansojong 11 ka construction workers ang nagdungan sa pagpa-bakuna.  Giingong gipa-absent sila sa ilang trabaho aron makapabakuna.

Sa pagsuwat niining balita kagahapon anaa na sa 16,000 ang nabakunahan ug gilaomang mosaka pa ang maong gidaghanon hangtud sa hapon.

Sayo pa, si Mayor Gerald Anthony “Samsam” Gullas Jr. nianunsiyo nga adunay premyo sa raffle ang magpabakuna.

Ang makakuha sa ikatulong ganti makadawat og P5,000; P8,000 ang ikaduha samtang P10,000 ang sa unang ganti.

Adunay P1,000 nga madawat ang 25 ka tawo samtang 104 ka tawo ang makadawat sa P500 isip consolation prizes.

Samtang sa Dakbayan sa Lapu-Lapu, nagpadayon pa gihaon nga hinay ang pagpamakuna sa senior citizens sa siyudad hangtud kagahapon.

Kini ang gibutyag ni Atty. James Sayson, vaccine czar sa siyudad.

Matud ni Sayson nga sa kasamtangan ang siyudad nakabakuna lang og 33 porsyento gikan sa kinatibuk-ang gidaghaon sa ilang mga senior citizen. —Gabriel C. Bonjoc ug Romeo T. Limpangog/BDB (BANATNEWS)