Mga militanteng grupo nagprotesta atol sa Bonifacio day

CEBU, Philippines — Dungan sa pag-selebrar sa ika-158th Birth Anniversary ni Andres Bonifacio kagahapon Nobyembre 30 nagpahigayon sab og lihok protesta ang nagkalain-laing militanteng grupo diha sa dalan Colon.

Si Jaime Paglinawan, Chairman sa BAYAN Central Visayas miasoy nga tumong sa pagpahigayon nila sa lihok protesta aron ipanawagan ang giingong pakyas nga Marco-Duterte tandem alang sa May 2022 National ug Local Elections.

Apil sab sa ilang panawagan nga wagtangon na ang contractualization sa mga mamumuo diin ilang gihagit ang mga nagpapili pagka presidente ug uban pa nga wagtangon na ang maong sistema.

Lakip sa ilang panawagan nga isaka ang suhulan sa mga mamumuo ilabi na pagtakda og regular minimum wage, pagpatuman sa tinuod nga reporma sa yuta ingon man pagdepensa sa teritoryo sa West Philippine Sea nga giingong giamong-amongon ni Presidente Rodrigo Duterte ug uban pa. Misalmot sa lihok protesta mao ang grupo sa BAYAN gipangunahan ni sa Alyansa sa mga Mamumuo sa Sugbo, ANAK BAYAN,  PISTON, KADAMAY , mga vendors sa Carbon,  Gabriela, ug mga mangingisda.

Ang mga nagprotesta gihatagan lang og 10 minutos nga makapahigayon sa ilang kalihukan ug malinawon ra nga na-disperse sa kapolisan dihang nilapas na kini sa gihatag nga tagal.

Suma pa sa hepe sa Police Station 3, Police Major Edgard Labe nga ilang gibuhat mao ang pagpatingog sa ilang patrol car aron pagpaundang sa mga nag-protesta kay nakabalda na kaayo sa dagan sa trapiko ang ilang gihimong kalihukan.

Hinuon malinawon ra nga nabungkag ang grupo sa mga nag-rally. MEL (BANATNEWS)