Manipis gisirad-an og balik human sa laing landslide
CEBU, Philippines — Gisirhan nasab pagbalik ang karsada sa Barangay Manipis, Dakbayan sa Talisay kagahapon.
Kini human sa laing pagdahili sa yuta ug bato sa kabukiran nga nitabon sa karsada sa sitio Campo 5.
Si Jonathan Tumulak, traffic czar sa siyudad niingon nga peligro gyud nga paagian ang lugar busa molibot nalang sa Uling, Naga ang mga motorista. Una niini, abli-sira ang karsada sa Manipis human sa sunod-sunod nga pagdahili sa yuta ug bato.
Maablihan kini human mahawan ang nakaali sa dalan apan matag karon ug unya dili kakumpiyansaan ang kabukiran tungod sa padayong paglihok niini.
Gihangyo ni Tumulak ang mga motorista nga adto lang una mo agi sa luwas nga karsada aron malikay sa disgrasya.
Maayo nalang sab gani kay walay naatlan nga motorista sa subling pagdahili sa yuta. —MEL (BANATNEWS)
- Latest
