Magpahigayon og kalihokan sa kadalanan pakuhaon og permit

CEBU, Philippines — Nipagawas og pamahayag ang Cebu City Transportation Office nga nagpahinumdom sa mga organizer sa nagkadaiyang kalihokan nga pagahimuon diha sa kadalanan nga kinahanglang mokuha kini og special permit.

Ang maong pagpahinumdom naumol human ang maong departamento nakadawat og report nga adunay usa ka kalihokan ang giingong pagahimuon sa umaabot nga mga adlaw nga wala mo proseso sa pagkuha og permit.

Nihangyo ang CCTO nga mas maayo nga sundon ang hustong proseso alang sa kaayohan sa tanan

Sa laing bahin, subsob ang gibuhat karon sa CCTO sa pagsita sa mga sakyanan nga dili motuman sa mga traffic sign. “Lisod gyud diay na sabton ang signage nga No Left Turn gikan sa 6-9 sa buntag og 4-7 sa hapon? O mamasin lang gyud nga malipat ang atong enforcer?”, tipik sa post sa CCTO diha sa ilang Facebook page.

Samtang niabot usab ngadto sa  11,073 ka citation ticket ang naisyu sa CCTO alang sa  buwan sa Oktubre niining tuiga ug dako kaayo kini kompara  sa 9,612 sa buwan sa Septiyembre .

Kasagaran sa kalapasan niini walay rehistro, Iisensya ug uban pa.

“Bisan pa man sa sige natong pahimangno nga dapat kompletohon nato ang atong mga papeles sa dili pa ibiyahe sa kadalanan ang mga sakyanan pero atong nabantayan nga daghan lang gihapon ang wala nituman niini”, tipik sa FB post sa CCTO.

Gipahinumduman ang mga nadakpan sa pagdala sa mga citation ticket sa ilang buhatan aron dili maabot sa punto nga mapasakaan og kaso nga mas hasol na hinuon. BDB (BANATNEWS)