Operation Bulak gilugwayan hangtud Nobyembre 4

CEBU, Philippines — Bisan pa man nga sirado karon ang mga sementeryo, magpadayon gihapon ang lapad nga pag-display sa kabuwakan diha sa Carbon Market nga tipik sa programang Operation Bulak.

Aron mas taas ang panahon sa pagbaligya niini, gilugwayan ang maong programa ngadto sa Nobyembre 4 nga gibuksan niadtong Biyernes.

Matud pa sa head sa Market Operations Division nga si Irvin Cabales nga dul-an sa 150 ka mga mamaligyaay og buwak ang nisalmot sa maong flower expo. Bisan paman sa nasudnong anunsyo sa miaging semana nga sirado ang mga sementeryo, gipadayon gihapon sa organizers ang maong kalihokan sanglit mahalin gihapon ang mga buwak kun diin  ang pamaagi sa ubang tawo kay adto na sa balay ang paghalad niini.

Matud pa nga nakalugsong na ang mamaligyaay og buwak hinungdan nga wala gyud kini gikanselar.

“Matag tuig naman nga gisaulog dinhi sa Carbon ang Operation Bulak, dili nato matino kun unsa tung tuiga nagsugod, basta dugay nani,” matud pa ni Cabales.

Kauban sa MOD sa pag-organisar sa maong kalihokan karong tuiga mao ang Cebu2World Development, Inc. sa Megawide Corp., nga maoy developer sa modernisasyon sa Carbon Market.     

Naumol ang Operation  Bulak isip paghatag og dakong kahigayonan sa flower growers nga gikan sa mga bukirang bahin sa Siyudad sa Sugbo nga maka-display sa ilang mga preskong produkto diha sa  Carbon Market.

Gipalapdan ang area sa pag-display ug nalakip niini ang pipila ka bahin sa dalan A. Borromeo ug F. Calderon. MEL (BANATNEWS)