Argao nipatuman og 50 porsyento nga capacity sa sementeryo
CEBU, Philippines — Nipatuman ang Lungsod sa Argao og maximum nga 50 porsyento nga venue capacity sa mga sementeryo sa lungsod Sugod niadtong Oktubre 26, 2021.
Base sa executive order ni Mayor Alan Sesaldo nga sirado ang mga sementeryo sa lungsod sugod sa Oktubre 29 hangtud sa Nobiyembre 2, 2021 subay sa kamandoan sa Inter-Agency Task Force apan sa ubang mga adlaw bukas ang mga sementeryo sa lungsod.
Magsugod pagbukas ang mga sementeryo sa lungsod gikan sa alas 8:00 sa buntag hangtud sa alas 5:00 sa hapon.
Ang tanang sementeryo o memorial parks sa lungsod kinahanglang mo designate og usa ka entrance ug usa ka exit.
Di usab tugotan ang panagtapok nga mosobra og 10 ka tawo sa sulod sa sementeryo.
Sa laing bahin, gitahod sa Simbahang Katoliko ang hukom sa nasudnong kagamhanan kalabot sa pagpasira sa mga sementeryo gikan sa Oktubre 29 ngadto sa Nobiyembre 2.
Matud ni Father Jonathan Rubin, pangulo sa Cebu Archdiocesan Digital Communications Ministry (CADComM) nga nikooperar ang simbahan sa kampaniya sa gobiyerno sa pagpanalipod sa panglawas sa katawhan.
"Respeto ug tuman lang ta sa lagda sa gobiyerno", matud ni Rubin.
Si Rubin nagkanayon nga bisan og dili kalag-kalag makaampo ra gyud ang mga tawo sa bisan unsang adlawa nga ipahinungod sa ilang mga minahal sa kinabuhi nga nitaliwan na ngadto sa laing kalibutan.
Sayo pa, si Acting Cebu City Mayor Michael Rama nipadayag nga sundon ang kamandoan sa Department of Interior and Local Government nga sirad- an ang mga sementeryo sa nahisgotang mga adlaw.
Samtang sa mga konsehal sa Siyudad sa Sugbo nga sila si Joel Garganera ug Jerry Guardo nga ilahang ipadangat ngadto kang Rama ang tinguha nga mahatagan og hinabang ang mga vendor sa sementeryo nga naapektohan sa pagsirado niini panahon sa kalag-kalag.
Nasayran nga sa niaging tuig gihatagan og bugas ang vendors sa sementeryo isip ilang ayuda. —Sanden J. Anadia/BDB (BANATNEWS)
- Latest