Nitugpa sa barko patay

CEBU, Philippines — Patay ang usa ka babaye human kini nilayat gikan sa Marcelo Fernan Bridge sa habig sa Mandaue City ug nitugpa sa usa ka barko diha sa ubos sa taytayan niadtong Miyerkules sa hapon.

Ang gituohang naghikog mao si Maricar Auguis, lumad nga taga Barangay Basiao, President Carlos P. Garcia, Bohol.

Base sa kuha sa CCTV footage gikan sa PNP Regional  Maritime Unit 7, ang babaye nakit-ang nagbarug sa ngilit nga bahin sa maong taytayan.

Sunod nga nakita nga nikatkat kini sa railing ug diretsong niambak padung sa ubos apan didto kini nitugpa sa takob sa manhole sa M/V Lady of Prosperity nga naatol nga niagi sa ilawom sa maong taytayan. Patay dihadiha si Auguis.

Atol sa pagpahigayon sa imbestigasyon sa kapolisan, adunay nakuha nga papel nga giprintang suwat nga pinirmahan niini. Ang suwat mao ang iyang panamilit ug nangangkon kini sa suwat siya nga “buros” o mabdos.

Matud pa niini sa suwat, buot na niyang makauli ngadto sa Bohol sa habig sa ginikanan sa iyang amahan, apan dunay mga tawong matud pa niini sa suwat babag sa iyang tinguha.

Ang mga imbestigador mosusi pa kun tinuod ba kining mabdos nga maoy gipangangkon niini sa iyang suwat. Tungod sa maong insidente, ang barko temporary unang nag-angkorahe sa Tayud sa lungsod sa Consolacion. —IBM (BANATNEWS)