Liquor ban sa Lapu-Lapu gilibkas
CEBU, Philippines — Hingpit na nga gisuspenso sa kagamhanan sa Dakbayan sa Lapu-Lapu ang gipatuman nga liquor ban.
Kini nonot usab sa pagsagop sa gimando nga protocols sa Inter-Agency Task Force on the Management of Emerging Infectious Disease (IATF-MEID).
Una niini ang IATF-MEID mipahibawo nga sugod Oktubre 20, 2021, ang Probinsiya sa Sugbo ipaubos na sa Alert Level System 2.
Si Mayor Junard Ahong Chan miluwat og Executive Order No. 2021-058 ug nalakip sa kamanduan ang pagsuspenso sa gipatuman nga liqour ban ug gitugot na ang pag-inom og ilimnong makahubog sa publikong lugar.
“The prohibition in the drinking or consumption of liquor in public places is hereby suspended until further notice,” nagkanayon ang maong E.O. ni Mayor Chan.
Dugang gitugot mao ang operasyon sa mga establisamento ug ingon man ang pagpahigayon og mga kalihokan apan ubos sa limitado lamang nga gidaghanon.
Ang mga establisamento gitugotan nga makapasulod og 50 porsiyento sa kapasidad sa ilang mga customers nga mga fully vaccinated samtang 70 porsyento usab nga kapasidad gitugot sa outdoor alang sa mga dili bakunado nga mga customer.
Hinuon nalatid usab sa E.O. nga kadto lang mga establisamento nga otorisado ug nakatuman sa requirements ang tugutan nga maka-operate. —MEL (BANATNEWS)
- Latest
